:
farao:
السلام عليكم ورحمة الله وبركاته ...
أسعد الله اوقاتكم وتقبل منا ومنكم صيام شهر رمضان المبارك ...
اولا حاب اشيد ببعض الاعضاء واسلوبهم في كتابة المواضيع وبأسلوبهم الجذاب المدعم بالعبارات الجيدة...
فعلا احس اني دفش بصياغة مواضيعي وردودي ... لكن عساني اتحسن الايام الجاية ان شاء الله ...
نجي للموضوع ...
موضوعي اليوم عباره قصه وحادثه شخصية حدثت منذ مده جمعتني بالرجل الغير مناسب في المكان المناسب ...
كنت ماشي بالسيارة بأحد الاحياء وانا ماشي لقيت حرمه في الثلاثينيات وبيدها بنتها تقريبا 9 سنين و تمشي ورا زوجها الي في الاربعينيات وبيده ولد عمره تقريبا 4 سنين وتقولوا بسوط جهوري لا يافلان هات الولد والراجل ماشي وماسك ولدها بيده ويقولها ماني معطيكي الولد ...
انا اخذت لفه حول العماره ورجعت نفس الشارع ووقفت على الكورنر في مكان مظلم وطفيت الانوار وجلست اراقب من بعيد لأني استغربت من الموقف ...
وشوية ولقيت سيارة شرطه وقفت جنبهم فأنا ارتحت وقلت الموضوع بينحل ... ومشيت وبعد شوية رجعت لنفس الشارع ولقيت الحرمه والراجل والشرطه مو موجوده ...
وشوية والحرمه سحبت الولد وحاولت تهرب وجى الراجل وخنقها على الجدار فأنا جيت داعس ووقفت بشكل مفاجئ جنبه وهو ارتبك وبعد عن الحرمه نزلت اصرخ عليه بعصبية وقلتله عيب تعمل كدا قدام البزورة تبغاهم يتعقدوا واذا عندك شيء حله بالبيت مو بالشارع ...
طبعا سيارتي نوعها شيء حق حكومه ... فالراجل شاف هيئتي واسلوبي معاه ودخلتي ووقفه السياره فقاللي انت مباحث ؟؟
انا اعطيته ايحاء بالإيجاب لكن ماقلتله ايوا ماحبيت اكدب لأنه فيها 3 شهور سجن ...
الراجل خاف وهجد وصار يتلعثم ويبرر سلوكه وكدا ...
وشوية وجاو اثنين من رجال الشرطه حق الدورية الي جاتهم اول على ما اعتقد وجرى الحوار التالي :
الشرطي 1 : وش عندكم ؟
انا : الراجل دا اتهجم على الحرمه دي و ...
الشرطي 2 : من انت ؟ من انت ؟
انا : انا عابر سبيل استثارني الموقف ...
الشرطي 1 : اجل اتفضل وجزاك الله خير ...
انا : والراجل دا ؟!؟ ايش حتسووا ؟
الشرطي 2 : ماعليك منه دا مجنون ...
انا : طيب مجنون وحتسيبوه هايت بالشوارع ويتهجم على الحرمه بالشارع قدام البزورة ويجبلهم عقد نفسية ؟؟!
الشرطي 1 : خله ماعليك نحن بنتصرف توكل على الله ...
الشرطي 2 : نحن عارفين شغلنا ...
انا مشيت ركبت السياره وانا في قمه الغضب ومشيت وبعد ساعتين خلصت مشوار وتعمدت امر بنفس الشارع ...
وتخيلوا !!
لقيت الحرمه فارشة فرشه عالرصيف وجالسه مع بزورتها جنب الشرطيين الي بالسياره وزوجها ينتظرها تبعد من جنبهم وجالس يراقب من بعيد ...
انا غضبت مره ورحت جبت واحد من الشباب على اساس نخطف الراجل ونوريه حق الله ...
لكن خويي منعنى وقال الشرطه قريبين وكدا ...
جى ببالي اعلانات الي تجي بالإم بي سي حق منظمه العنف الاسري الي يقولك توعيه وبلغ و ... إلخ ...
فدقيت على السنترال وجرى الحوار التالي :
انا : السلام عليكم
السنترال : وعليكم السلام
انا : اقولك اعطيني رقم دول حق العنف الاسري ...
السنترال : خذه معاك ...
سجلت الرقم واتصلت وجرى الحوار التالي :
الموظف : مرحبا
انا : السلام عليكم
الموظف : اي خدمه
انا : لو سمحت ابغى ابلغ عن حالة عنف اسري ...
الموظف : اوكي ايش طبيعه الحالة ؟
انا : قلتله القصة ...
الموظف : دام الشرطه عندهم نحن مو من صلاحياتنا نتدخل .
>>> عرفت انه دا بيعاملني باللوائح وماله كلمة ...
انا : لو سمحت حولني برئيسك ..
الموظف : لحظة ... ...
المدير : اهلا
انا : السلام عليكم
المدير : وعليكم السلام ...
انا : لو سمحت ابغى ابلغ عن حالة عنف اسري و... وقلتله القصه ...
المدير : مادام الشرطه عندهم نحن مالنا دخل .
انا : ياسيدي الفاضل الحكاية لها اكثر من 3 ساعات والشرطي عنده خبر من ساعتين وماعمل شيء ...
وهذه حاله عنف اسري ومن اختصاصكم ...
المدير : شوف ياعزيزي نحن مانتعامل الا مع الحالات الي تجينا هنا المركز ...
انا : ياراجل !! ... يعني الراجل يجيكم وبيده مرته ويقولكم ياجماعه الخير انا لي يومين اضرب المدام يريت تشوفولنا صرفه ؟!؟؟؟
المدير : لا بس هذا النظام ...
انا : طيب اسمع انا مستعد اتحمل المسؤلية واجيبلك افراد العيله كلها عند باب مكتبك لكن توعدني انك تتصرف ؟؟؟
المدير : آسف دوامنا بينتهي بعد ربع ساعه ... تقدر تجيبهم وانا بخلي الحارس يفتحلك الباب ...
انا : ياراجل من جدك ؟؟؟ وقفلت الخط في وجهه ...
وصفيت الموضوع ودمي يغلي ... وقلت لها رب يحميها ...
مع انه الحكومه الله يجزاها خير توفر دورات بشكل دوري للعناصر لكن يظل هناك افراد ليسوا على كفاءه عالية ...
فلكل قاعده شواذ
الأسئلة ...
س - هل تعتقد انه جميع افراد الشرطة والدوريات مؤهلين للتعامل مع الحوادث المفاجئة والاستثنائية ؟؟
س - هل الجمعيات التي لدينا وجدت لتعمل ام ليقال ان لدينا جمعية ؟!؟
س - هل ترى ان البيرو قراطية متفشية بدوائرنا الحكومية ( الي هوا التعقيد بالإجراءات بدون سبب فقط لتعطيل الناس وكل شوي يطلعلك ورقة ناقصه ويقولك تعال بكرة و ... إلخ ) ؟!؟
س - ماهو الإجراء الذي يلزم الجمعيات بعمل واجباتها والحفاظ جودة وكفاءة في عملها ؟!؟
س - ماهو التصرف الأمثل الذي كان يجب ان اعمله كشخص عابر ؟!؟
ومعذرة على الاطالة ... وتقبلوا تحياتي ...