بالله عليكم لو الواحد عمل الحاجات دية هيبقى حمااااااااار

فى الحقيقة بقالى يومين مكتبتش موضوع فى المنتدى

ودى احدى متع الحياة بالنسبة لى انى اتفاعل معاكم

ربما لاحساسى بان كل فرد فى المنتدى هو اخ او اخت ليا

ولكن احساسى المرة دى مختلف وانا بكتب لان الموضوع الى عايز اتكلم فية هو

الوطن

وكلمة الوطن بالنسبة لى يعنى مصر

واجعنى اوى اوى اوى انى شايف وطنى بيتحط فى الوحل

واهلى وناسى بقو بكل اسف الاقل شأن فى كل دول العالم

وانا مقصدش بالكلام دة الاهانة لانى عارف ان فيه عباقرة مصريين فى كل مكان فى الكون

ولكن كلامى عن الناس البسيطة الى الدنيا مبهدلاهم ولقمة العيش بتذلهم فى كل مكان

فى الحقيقة مش قادر اتصور اية معنى ان شخص يكون غنى ومكروه

اية معنى المنصب والسلطان والجاة وانا مكروه من اهلى

ومحبوب شكلا من عدوى

يا ترى هل هكون اقوى

انى اكون مدير لشركة قوية

ولا اكون مدير لشركة ضعيفة

يعنى لو انا سهرت وتعبت علشان اخلى شركتى شركة قوية

واهتميت بالعمال واديهم مكافئة تشجيعية واهتميت بصحتهم و عيالهم وعيشتهم

دة هيكسبنى اكتر ؟

ولا انى انهب فى الشركة واطلع عين العمال

وارميلهم فتافيت فلوس لغاية ما الشركة تنهار ؟
و لو رحت اجتماع محدد مسبقا مع مدير شركة عملاقة

انا كمدير لشركة منهارة
ومعايا مدير تانى لشركة قوية
يا ترى مين الى هيدخل الاول علشان يقابل مدير الشركة العملاقة ؟؟
ومين الى هيتركن زى الكلب برة ويستنى لما الاجتماع الاول يخلص؟؟
ويا ترى لو كنت صاحب الشركة الاقوى مكنتش هفرض شروطى على صاحب الشركة العملاقة ؟
وكنت هتقابل من على باب عربيتى باحترام حقيقى وادخل فى ميعادى اولا ؟
مهو بالعقل لو انا راجل محترم اكيد الناس هتحبنى وهتحترمنى
وبدل مبقى صاحب شركة هبقى صاحب شركات
وهبقى غنى جدا جدا وكمان الناس الى بتشتغل عندى هتبقى غنية
يعنى بمعنى تانى كل يوم ممكن اخد بيضة دهب من الفرخة الى بتبيض دهب
وممكن تفقس كتاكيت دهب يبقو فراخ تبيض بيض دهب برضة
لكن ابقى راجل حمار انى ادبح الفرخة علشان اخد الدهب كله مرة واحدة من جوة الفرخة
لان ببساطة مفيش منجم دهب جوة الفرخة لكن جسم الفرخة هو الى بيكون دهب
وجسم الفرخة هو كل خلية فيها كبرت او صغرت
فلازم ازرع للفرخة اكل واراعيها صحيا ونفسيا علشان تسمن وبيضها يكبر
ولو عملت غير كدة يبقى انا راجل
حماااااااااااااار
مش كدة ولا اية رايكم ؟؟
الموضوع السابق تمت كتابته بقلمى وزى منتو ملاحظين كاتبه بلغة الاشارة
وكل لبيب بالاشارة يفهم